Pag-ibig at Pagboto: Bakit lagi tayong nasasaktan in the end

election_posters

Nagsisimula naman lahat yan sa pangako. “Hindi kita iiwan.” “Hindi ako magnanakaw” Naniwala ka kasi gusto mo maging masaya. Gusto mo guminhawa. Pagkatapos makuha ang lahat sa’yo, iiwan ka na lang.

Andyan din yung cliche na pangako na “Hindi ako katulad ng iba.”

Pero nagtiwala pa din tayo. Umasa. Nasaktan. Di na natuto. Kasi kung natuto man tayo, diba dapat matagal na tayong naka-move on? Literal na move-on. Nasaan na ba tayo ngayon? Hanggang dito na lang ba?

Pag bumoto ka, para ka na ding nagmahal dahil:

  • Magpapapogi sila para lang makuha ang matamis mong “Oo.” Sa una, sila ay mabait. Bubuhusan ka ng pagmamahal. Aalagaan ka. Once na nakuha na nila ang tiwala at pagmamahal mo, ang masasayang alaala mo lang sa kanya kapag naghiwalay ang inyong landas ay ang taong minahal mo noon, hindi ang taong nakikita mo sa SONA sa harap mo ngayon. Ang eleksyon, isang mahabang dulaan ng ligawan. May mga ibang naka-costume at mas madami ang naka-maskara.
  • Bumuboto ka kasi with your feelings. Matuturing bang pagmamahal pag walang emosyon na involved? Syempre hindi! Feelings are everything. Tayong mga Pinoy, mahilig pa naman sa feelings. Kahit hindi pa nga nagtatapat yung tao, mga feelingero at feelingera na tayo. Nilalagyan natin ng feelings lahat, binibigyan natin ng meaning lahat ng bagay. Eto ang sigaw ng dugo at puso natin, bakit natin di papansinin? Boring pag ginamitan mo ng utak. Hanggang sa school at trabaho lang ang pag-iisip. Kung mag-iisip ka palagi, di mo na ma-eenjoy mga bagay-bagay, lalo na mga palabas sa telebisyon. Kaya, I repeat, feelings are everything.
  • Kung nasisiyahan ka sa kanya o sa mga pinaggagawa niya, siya ang pipiliin mo. E masaya ka sa kanya e. So what kung action star siya dati? So what kung di siya nakapagtapos ng pag-aaral? So what kung madami siyang naging anak sa labas? Diba nga sa pagmamahal, past is past. Ang mahalaga ay kung ano siya ngayon. Ang mahalaga ay nawiwili ka sa kanya ngayon, lalo na pag nakikita mo siya sa TV. Kesa naman yung panay ang English pero di mo naman maintindihan ang mga pinagsasabi. Pfffft! Siya na ang magaling.
  • Kapag nakalimutan na tayo, lahat ng bagay isisisi sa kanya. Magagalit tayo. Niloko ba naman tayo e. Self-righteous anger: tayo ang niloko so tayo ang may karapatang magalit. Yun nga lang, di natin naalala sa kabilang banda, tayo ang namili at nagkamali. Of course, lahat naman tayo nagkakamali. Wala nga lang mangyayari kung lagi kang nagkakamali every 6 o 4 years.
  • Dahil crush ng bayan, siya na din ang pipiliin mo. Tandaan: Mahirap sumakay sa bangka na marami ang nakasakay. Mas lalong mahirap pag walang patutunguhan ‘yung bangka. Wag tignan kung ilan ang likes niya sa Facebook o kung ilan ang followers niya. Kung titignan mo lang ang numero, tignan mo kung ilang panukala ang naisabatas niya o kung ilan ang naipagawa niyang mga proyekto na may kwenta at pang-matagalan. Kung ang boto ay pagmamahal, mas mabuti nang itaya mo ito sa taong bumabawi sa gawa, hindi lang puro salita.
  • Kapag nabigo ka, hindi ka natututo. Bakit lagi ka na lang nilang binibigo? Bakit lagi kang dismayado? Sineseryoso mo naman ang pagpili ah. Kumbaga sa context ng pagmamahal, saan ka nagkamali: Sa pagmamahal ng tao o sa konsepto mo ng pagmamahal itself? Ano ba ang ideya mo ng pagpili? For short-term o long-term happiness ba? Kung masaya ka lang sa ganyan, hanggang diyan ka na lang talaga. Pero kung nakukulangan ka pa, walang masama na maghangad ka ng tunay na pagmamahal. Wala ding masama kung maghahangad ka ng tunay na kaginhawaan.

Bakit ba bigo tayo lagi sa dalawa? Mahirap buksan ang mga mata sa mga tunay na nangyayari, pero ang unang hakbang para makamit ang kalayaan ay ang pagtanggap sa mapait na katotohanan na matagal na tayong niloloko. Na hindi binibigay sa atin ang kaligayahan na karapat-dapat sa atin.

Pinag-uusapan pa din ba natin ang pagboto o pagmamahal? Meron bang pagkakaiba?

Ang mahalaga, sana ay matuto na tayong lahat.

Kahit mali nagiging tama, basta ba'y natututo ka (1)
#MayTama


Leave a Reply

Your email address will not be published. Required fields are marked *